Kryetarja e LSI-së, Monika Kryemadhi po zhvillon një konferencë të përbashkët me gazetarët, ku paralajmëroi se viti 2018 do të jetë një vit i vështirë për politikën, por edhe për ekonominë shqiptare.
Kryemadhi foli sërish për ekonominë në rënie, teksa tha se qeveria ka larguar investimet e huaja, ndërsa tha se familjet shqiptare do të kalojën një periudhë mjaft të vështirë.
Ndërkohë, kryetarja e LSI-së, nuk foli për protestat e ardhshme, që pritet të nisin së shpejti.
Fjala e Kryemadhit:
2018-a do të jetë një vit shumë i vështirë për politikën, por edhe për ekonominë shqiptare.
2017-a ishte viti i zgjedhjeve kriminale që njollosën politikën shqiptare, ishte viti i kanabizimit, viti i kapjes së shtetit që coi në shkatërrimin e Reformës së Drejtësisë.
Investimet e huaja kanë qenë zero, papunësia është bërë shkaku i largimeve masive.
Të ardhurat tatimore dhe doganorë kanë pasur një rënie drastike.
Paketa fiskale e re do sjellë një pasiguri dhe rritje çmimesh për konsumatorët. Me pak fjalë, buxhetet familjare do hyjnë në një krizë varfërie.
Qeveria tashmë e paaftë për të thithur investimet e huaja. Të dhënat e publikuara e bëjnë të qartë se hapja e negociatave me Be-në dhe reforma në drejtësi nuk mund të realizohen.
Për kryeministrin e rilindjes do të jetë një vit izolimi.
