Kryetari demokrat në ikje i Bashkisë së Mallakastrës, Agron Kapllanaj, thotë se zgjedhjet e 30 qershorit nuk do të njihen nga demokratët. Pas mbledhjes që kryebashkiakët e djathtë patën në selinë blu me kryetarin Lulzim Basha, Kapllanaj tha se të gjithë kryebashkiakët në ikje të PD-së do të ndjekin të njëjtin skenar, duke mos i liruar zyrat. Ai shtoi se do të lirojë zyrën kur të ketë zgjedhje, e jo votime, pasi nuk i njohin.
“Do ta lirojmë zyrën kur të vijë pasardhësi jonë i zgjedhur sipas ligjit. Kur të ketë zgjedhje; jo votime, këto votime nuk i njohim. Ky është vendim i marrë, i bërë i ditur edhe nga opozita, nga kryetari. Ky është një vendim që e kemi shprehur disa herë, këto janë zgjedhje farsë, nul, nuk do të njihen.
Do vazhdojmë të qëndrojmë në detyrën tonë. Nëse do të vijë të fitojë në zgjedhjet e tjera, ne do ta mirëpresim, do t’i dorëzojmë shiritin sipas rregullave. Nuk mbaj me dhunë asnjë zyrë, por do t’i shërbejmë qytetarëve. Nuk është problemi nëse e kërkon Basha apo dikush tjetër, zgjedhjet janë nul, janë votime për Partinë Socialiste”, u shpreh Kapllanaj.
Në zgjedhjet e 30 qershorit, Qerim Ismailaj, kandidat nga Partia Socialiste fitoi me 5692 vota përballë kandidatit nga Bindja Demokratike Robert Brahaj, i cili mori 471 vota.
Sipas Kapllanajt, nuk mundet që Mallakastrën ta drejtojë një kryebashkiak që ka marrë vetëm votat e militantëve të PS-së. Ai tha me ironi më tej se kandidati ka marrë 13 % të votave, ku aq janë vetë anëtarë të PS-së.
“Kandidati ka marrë 13 % të votave, aq janë vetë anëtarë të PS-së. Ai është kryetari i militantëve të PS-së në atë zonë, nuk është i qytetarëve”, tha ai.
