Kroacia dhe Zvicra pritet tu bashkohen 26 skuadrave të tjera që kanë siguruar pjesëmarrjen në botërorin “Rusi 2018”. Pasi në ndeshjet e parë të fazës “play-off” arritën të mposhtnin kundërshtarët e tyre Greqinë dhe Irlandën e Veriut. Duke parë rezultatin e thellë që u mposhtën helenët në Zagreb e gjithë vëmendja do të bjerë në përballjen e helvetëve me irlandezoveriorët, të cilët u mposhtën në ndeshje parë nga një 11-metërsh shumë i dyshimtë.
Skuadra e Martin O’Neill do të tentojë të hakmerret në Basel për atë episod që vendosi fatin e takimit të parë dhe nuk do të dorëzohet lehtë, por do të jetë mjaft e vështirë që të mposhtë vendasit. Sigurisht ekipi helvet luajti shumë më mirë dhe Zvicra ishte skuadra që kërkoi vazhdimisht golin e avantazhit, megjithatë për penalltinë që bëri diferencën “bardhekuqtë” duhet të falënderojnë shumë 37-vjeçarin rumun, që akordoi pa kurrfarë mëdyshje 11-metërsh, topin e përplasur në shpinën e mesfushorit Corry Evans, pas gjuajtjes fluturimthi nga jashtë zone të Xherdan Shaqirit.
Përfaqësuesja helvete kërkon kualifikimin e 11 për në fazën finale të një botërori, ndërkaq përballja e vetme ndërmjet tyre është regjistruar 53 vjet më parë në Lozanë, kur ekipi vendas fitoi takimin me shifrat 2-1. “Norn Iron” numëron 3 pjesëmarrje gjithsej, sidoqoftë për të shpresuar në një mrekulli 48-vjeçari nga Portadoën duhet të ndryshojë domosdoshmërish mënyrën e lojës dhe të orientojë më shumë drejt sulmit skuadrën, diçka që rrezikon t’i ekspozojë “bardhejeshilët” në mbrojtje, për të pësuar gola të tjerë nga një ekip si Zvicra që kundërsulmon tepër rrezikshëm, e që nuk mundet brenda në një takim kompetitiv prej tre vjetësh, që nga disfata 2-0 me Anglinë e Roy Hodgson-it.
Shumë më e lehtë pritet të jetë detyra e Kroacisë, që duket vërtet pranë pjesëmarrjes së pestë në finalet e Kupës së Botës, teksa duhet të mbrojë thjeshtë rezultatin e thellë 4-1 të ndeshjes së parë. Në Stadiumin ‘Maksimir’ të Zagrebit, trajneri Zlatko Daliç parapëlqeu ta interpretojë takimin pa sulmuesin Mario Mandzukiç, megjithatë Kroacia dominoi gjatë gjithë ndeshjes, duke hedhur një hap të sigurt drejt botërorit rus.
“Bardheblutë” kanë marrë pjesë rregullisht si në Afrikën e Jugut ashtu edhe në Brazil, megjithatë një pjesëmarrje për herë të katërt në fazën finale të Kupës së Botës duket vërtet e pamundur për Greqinë, me kontingjentin e lojtarëve që ka aktualisht në dispozicion. Në krahun tjetër që pas shpalljes së pavarësisë miqtë janë kualifikuar në 9 nga 11 aktivitetet e rëndësishme, pra evropian dhe botëror, por mbi të gjitha që të eliminohet këtë radhë Kroacia duhet të pësojë disfatën më të rëndë në 8 vitet e fundit, që nga humbja 5-1 në ‘Wembley’, me Anglinë e Capello-s.
