Një delegacion i Parlamentit Evropian do të mbërrijë në Tiranë, për shkak të situatës politike në vend. Zyrtarët e PE-së mbërrijnë sot në kryeqytet, me qëllim kthimin e vendit në normalitet, pas braktisjes së mandateve të deputetëve të opozitës dhe protestave të njëpasnjëshme të saj. BalkanWeb ka zbardhur axhendën e zyrtarëve të PE-së.
Fillimisht, delegacioni do të takohet me dy krerët e opozitës, Lulzim Bashën dhe Monika Kryemadhin në orën 16:15-17:00.
Po ashtu në orën 17:10-17:50 do të takohen me ministrin e Brendshëm, Sandër Lleshaj. Këto takime do të zhvillohen në zyrat e delegacionit të BE-së në Tiranë.
Në axhendë është parashikuar edhe një takim me kryeministrin Rama dhe Gent Cakajn e ministrisë së Jashtme. Takimi pritet të zhvillohet në kryeministri në orën 18:10-19:10.
Takimet do të vijojnë edhe gjatë ditës së nesërme. Kështu që në orën 08:00-08:45 të mëngjesit është parashikuar një takim me kryeparlamentarin Gramoz Ruçi në Kuvend, ndërsa në orën 09:00-10:00 do të takojnë përfaqësues të organizatave të Shoqërisë Civile, përfshi edhe 2 studentë nga Lëvizja për Universitetin te Mak Albania.
Në orën 10:15-10:30 të dërguarit e PE-së pritet të dalin me një deklarata finale.
