Gjenerali i lartë amerikan Mark Milley, ka thënë se një pushtim rus i Ukrainës do të ishte “i tmerrshëm” dhe do të çonte në një numër të konsiderueshëm viktimash. Gjenerali Milley e përshkroi ndërtimin e 100.000 trupave ruse pranë kufirit të Ukrainës, si më të madhin që nga Lufta e Ftohtë.
Por Sekretari i Mbrojtjes i SHBA, Lloyd Austin, tha se konflikti mund të shmanget përmes përdorimit të diplomacisë. Rusia mohon planet për të pushtuar, dhe thotë se mbështetja e SHBA për Ukrainën është një kërcënim.
Në një konferencë shtypi në Pentagon të premten, gjenerali Milley – oficeri më i lartë ushtarak i presidentit amerikan Joe Biden – paralajmëroi se shkalla e forcave ruse pranë kufirit të saj me Ukrainën, nënkuptonte se një sulm do të kishte pasoja të rënda.
“Nëse kjo do të lëshohej në Ukrainë, do të ishte e rëndësishme, shumë domethënëse dhe do të rezultonte në një sasi të konsiderueshme viktimash”, tha kryetari i shefave të përbashkët të shtabit.
Lufta në zona të dendura urbane do të ishte “e tmerrshme, do të ishte e tmerrshme”, shtoi gjenerali Milley.
“Jo e pashmangshme”
Sekretari i Mbrojtjes i SHBA-së, Lloyd Austin, tha se SHBA-të ishin të përkushtuara për të ndihmuar Ukrainën të mbrohej, duke përfshirë edhe sigurimin e armatimeve. “Konflikti nuk është i pashmangshëm. Ka ende kohë dhe hapësirë për diplomaci”, tha zoti Austin, duke i bërë thirrje presidentit rus Vladimir Putin të de-përshkallëzojë situatën.
“Nuk ka asnjë arsye që kjo situatë duhet të kalojë në konflikt… Ai mund të urdhërojë largimin e trupave të tij”, shtoi ai.
Gjithashtu të premten, presidenti Biden tha se do të dërgonte një numër të vogël trupash në Evropën Lindore në “afatin e afërt”, për të forcuar praninë e NATO-s në rajon. Ai nuk specifikoi se ku do të vendoseshin, dhe kur do të mbërrinin.
Në fillim të kësaj jave, Pentagoni tha se ishin 8.500 trupa të gatshme luftarake në gatishmëri. SHBA-ja ka refuzuar një kërkesë kyçe të Moskës që NATO të përjashtonte mundësinë e anëtarësimit të Ukrainës në aleancën e mbrojtjes – por këmbënguli se ajo po i ofronte Rusisë një “rrugë serioze diplomatike”.
Presidenti rus Vladimir Putin akuzoi Perëndimin për injorimin e shqetësimeve të sigurisë së Rusisë. Franca tha se të dy udhëheqësit kishin rënë dakord për nevojën për të de-përshkallëzuar dhe se presidenti i saj Emmanuel Macron i kishte thënë zotit Putin, se Rusia duhet të respektojë sovranitetin e shteteve fqinje.
“Mos krijoni panik”
Paralajmërimet nga Pentagoni vijnë pasi presidenti ukrainas Volodymyr Zelensky u tha gazetarëve, që të mos krijojnë panik lidhur me grumbullimin e trupave ruse në kufijtë e vendit të tij. Në një konferencë shtypi në Kiev, Zelensky tha se ai nuk sheh një kërcënim më të madh tani, se sa gjatë një grumbullimi të ngjashëm të trupave pranverën e kaluar.
“Ka sinjale edhe nga udhëheqës të respektuar të shteteve, vetëm thonë se nesër do të ketë luftë. Ky është panik – sa kushton për shtetin tonë?”
“Destabilizimi i situatës brenda vendit”, ishte kërcënimi më i madh për Ukrainën, tha ai.
Burimi i lajmit: BBC. Përshtatur nga Tirana Today
