Ministrja e Kulturës, Mirela Kumbaro, teksa ka qenë e ftuar në “Natë me Xhaxhiun”, është ndalur tek problematikat që ka patur si Ministre Kulture këtë vit. E pyetur se pse ka pasur vazhdimisht kontestime kultura, Kumbaro u shpreh se nuk e konsideron si një problem.
Ajo tha se më herët, kultura nuk ka qenë ndonjëherë prioritet. Po kështu Kumbaro foli edhe për trefishim të investimeve në kulturë, jo vetëm nga buxheti, por dhe me fonde të tjera.
“Unë vij drejt e nga zyra. Kam pasur një ditë të ngarkuar. Nëse ju e përmendni si problem, unë e konsideroj si kompliment. Ne të dy e dimë se deri para 5 vitesh, nuk flitej fare për kulturën.
Më para nuk ka qenë ndonjëherë prioritet kultura. Nëse kultura është prioritet tashmë, e tregon fakti se kemi një Ministri vetëm për kulturën. 0.4% e buxhetit nuk është shumë, por e gjeta buxhetin me 0.2 %.
Ne kemi trefishuar vlerën e investimeve në kulturë, jo vetëm nga buxheti, por dhe me fonde të tjera. Nuk është e thënë se çdo gjë bëhet me buxhetin e shtetit. Duhet që gjithkush të kontribuojë.
Mua nuk më rezulton. Më rezulton se jemi më shumë të duartrokitur, sesa kontestuar! Ka një mënyrë që mos të të shaj njeri, dhe ajo është të mos bësh asgjë. Dhe unë nuk zgjodha këtë. Kërkesat janë më të mëdha sesa mundësitë për tu realizuar, dhe këtu këtë gjë unë e mendoj si pozitive. Në 30 vite na takon të përballemi me faktin që çdo gjë ka për detyrë për tu rregulluar”, përfundoi Kumbaro.
