Kristjan Asllani nuk është i lumtur te Interi, e ndaj kërkon largimin nga zikaltërit në formulën e huazimit. Minutazhi i paktë dhe pankinat e shumta edhe pse Marselo Brozoviç është ende i dëmtuar, janë arsyet përse dëshiron largimin nga Interi që në janar, muajin që përkon me hapjen e dritares së transferimeve. Kjo është ajo çfarë shkruhet në “TuttomercatoWeb”.
20-vjeçari nga Elbasani erdhi te zikaltërit për të qenë zëvendësuesi i Marselo Brozoviç në rolin e regjisë përpara mbrojtësve, por mesa duket Simone Inzagi ka preferuar më së shumti Hakan Çalhanollunë dhe Henrik Mikitarianin në rolin e Brozoviçit të dëmtuar.
Futbollisti kuqezi dëshiron të largohet në huazim te ndonjë skuadër që i garanton minuta në këmbët e tij.
Aktualisht në të gjitha kompeticionet me fanellën e Interit, Kristjan Asllani është aktivizuar në total në 8 ndeshje duke mos shënuar dhe asistuar asnjë herë.
