Pas 17 vitesh në kërkim nga policia vendase por edhe nga Interpoli zbulohet identiteti i vërtetë i vrasësit shqiptar.
41-vjeçari Hektor Mahmutaj, i renditur në listën e emrave më të kërkuar të Interpolit ka arritur ti shpëtojë dënimit të marrë në vitin 2000 për afro dy dekada.
Mahmutaj kërkohej nga Interpoli për vrasjen e një bariu në Fier dhe është arrestuar nga policia holandeze.
Sipas raportimeve të deritanishme, pohohet se 41-vjeçari është kapur nga policia teksa udhëtonte me një makinë të marrë me qira, pas dyshimeve të autoriteteve holandeze për dokumentet e tij.
Policia zbuloi që ai përdorte një identitet fals grek, dhe pas hetimeve zbuloi që në të vërtetë ishte krimineli shqiptar i renditur në listën e emrave më të kërkuar të Interpolit.
Mahmutaj u dënua në mungesë në tetor të vitit 2000 me 25 vjet burg për vrasjen e bariut 28-vjeçar Gentian Jahaj në fshatin Bejar, kur ky i fundit nuk i kishte hequr bagëtitë e tij nga rruga.
Ai arriti të arratisej në Mbretërinë e Bashkuar, atje ku u dënua me dy vjet e gjysmë burg në vitin 2007, kur policia gjeti një pushkë të palicencuar në posedim të tij.
Ndërsa ishte në burg, ai u informua se kërkesa për ekstradim e Shqipërisë ishte refuzuar me arsyetimin se dërgimi i tij në vendlindje do të shkelte të drejtat e tij.
Në mënyrë që Muhmataj të vuajë dënimin në Shqipëri, autoritetet shqiptare duhet të bëjnë kërkesë ekstradimi Holandës.
