Rusia tha të mërkurën se kishte shtënë dhe në trajektoren e një anijeje luftarake britanike, në formë paralajmërimi, për ta përzënë atë nga ujërat e pretenduara të Moskës në Detin e Zi pranë gadishullit të Krimesë.
Britania kundërshtoi njoftimin e Rusisë për incidentin, duke deklaruar se kishin menduar se të gjitha të shtënat ishin një “stërvitje artilerie” e paralajmëruar ruse dhe se asnjë bombë nuk ishte hedhur. Por britanikët njëkohësisht konfirmuan se shkatërruesi i tyre, HMS Defender, kishte lundruar nëpër ujëra që i përshkruan si “ujëra që i përkasin Ukrainës”.
Anija “po bënte një kalim të padëmshëm përmes ujërave territoriale të Ukrainës në përputhje me ligjin ndërkombëtar”, tha Ministria e Mbrojtjes e Mbretërisë së Bashkuar në një deklaratë.
Zëdhënësi i Kryeministrit Boris Johnson tha: “Është e pasaktë të thuhet se u qëllua ose se anija ishte në ujërat ruse”.
Ekspertët ushtarakë thanë se pavarësisht nëse detajet ishin të sakta apo jo, incidenti dukej se përfaqësonte një përshkallëzim në konfrontimin midis Perëndimit dhe Rusisë në rrugët e diskutueshme detare.
