Një masakër ndodhi dje në Tiranë, ku Arsen Muskurti vrau me pistoletë vëllain e tij Dritan Muskurti dhe kunatën Nora Muskurti. E gjithë skena e krimit ka zgjatur vetëm 14 sekonda, duke u nisur nga momenti që Arsen Muskurti hyn në derë të agjencisë me pistoletë në dorë, dhe më pas del nga aty.
Pak minuta më vonë, autori është vënë në prangat e policisë në lagjen “5 Maji”, ku të pranishëm gjatë momentit të arrestimit ka qenë edhe bashkëshortja, djali i tij dhe një avokat.
Sipas raportimeve në media, palët kishin konflikte prej kohësh për çështje pronësie mes tyre, aq sa mosmarrëveshjet degjeneruan dhe në rrjetet sociale, ku autori i krimit akuzohej për lidhje jashtëmartesore. Nga rrjetet sociale, Arsen Muskurti rezulton besimtar i devotshëm i fesë islame dhe se kishte studiuar në universitetin e Arabisë Saudite. Para krimit, Arseni dhe Dritani u konfliktuan në një lokal dhe më pas shkuan në agjencinë turistike në pronësi të 44-vjeçarit.
Nga një kamera sigurie pranë biznesit në fjalë, shikohet Arseni i armatosur që hyn, qëndron disa minuta dhe largohet qetësisht. Ai u kap nga RENEA në rrugën “5 maji” teksa po priste një automjet që të largohej në drejtim të “Rrugës së Arbërit”. Në momentin e arrestimit, Arsen Muskurti ishte i shoqëruar nga gruaja, njëri prej fëmijëve të tij dhe një avokat. Në polici, ai tregoi se e hodhi armën në një kosh plehrash.
Të dy vëllezërit kishin biznese secili në pronësinë e vetë. Arseni zotëronte një dyqan bimësh mjekësore “Natyral Vita” në rrugën “Myslym Shyri”, kurse vëllai i tij një agjenci turistike. Ata raportohen të kenë pasur konflikte pronësie që prej vitit 2009 për çështjen e agjencisë turistike. Arseni dhe Dritani shkonin shpesh në polici për shkak se konfliktoheshin vazhdimisht me njëri-tjetrin. Ajo çfarë e bën ngjarjen akoma më tronditëse, është se Arseni ka akuzuar vëllain e tij, kunatën dhe disa persona të tjerë se po e godisnin pabesisht në rrjetet sociale. Në një prej postimeve, ai e akuzon vëllain e tij, Dritanin, se ka ndryshuar emrin nga Alban që mbante dikur pasi ka qenë i dënuar në Itali për prostitucion dhe vjedhje si dhe i është ndaluar hyrje në çdo vend të BE-së.
