Duket se çështja e krijimit të ushtrisë evropiane, nuk po gjen konsensus mes Trump dhe Macron. Më herët, presidenti i SHBA, Donald Trump dhe homologu i tij francez, Emmanuel Macron, u takuan në Paris. Dy liderët diskutuan idenë e shtruar më herët nga presidenti i Francës, Emanuel Macron, për formimin e një “Ushtrie Evropiane”, për t’i lejuar kontinentit evropian të mbrohet nga kërcënimet e mundshme. Qëndrimi i Macron nuk u la pa u diskutuar. Shefi i Shtëpisë së Bardhë e cilësoi propozimin e ardhur nga presidenti Macron, një ide të gabuar. Madje Trump ka shkruar edhe në Twitter se ishte “fyese” që kreu i Elizesë kishte bërë një thirrje, për një ushtri të përbashkët të BE-së, për të trajtuar kërcënimet nga SHBA, Kina dhe Rusia.
Macron ngriti çështjen e ushtrisë, duke thënë se është e padrejtë të kemi sot një sistem evropian të sigurisë, të garantuar nga SHBA-ja, dhe se ka ardhur koha që evropianët të krijojnë një sistem të vetin mbrojtje.
“Ne duhet të mbrojmë veten në lidhje me Kinën, Rusinë dhe madje edhe Shtetet e Bashkuara të Amerikës”, tha Macron në një intervistë televizive. Duket se gjakrat janë ndezur sërish, pasi Trump ka reaguar përmes postimeve në Twitter.
“Emmanuel Macron sugjeron ndërtimin e ushtrisë së vetë, për të mbrojtur Evropën kundër Amerikës, Kinës dhe Rusisë. Por ishte Gjermania në Luftën e Parë Botërore dhe të Dytën. Si funksionoi kjo për Francën? Ata filluan të mësonin gjermanisht në Paris, përpara se të vinte Amerika. Paguaj për NATO-n, ose jo!”.
Më herët, Macron ngriti çështjen e ushtrisë duke sqaruar se evropianët nuk mund të mbështeten më tek mbrojtja e Shteteve të Bashkuara. “Ne duhet të mbrojmë veten në lidhje me Kinën, Rusinë e madje edhe SHBA-në”, pohoi Macron për radio stacionin francez Europe 1.
