Presidenti i Komisionit të Venecias, Gianni Buquicchio, ka ngritur alarmin për nivelin e korrupsionit në Shqipëri.
Në një intervistë për Vizion Plus, Buquicchio thekson se ky fenomen është mjaft i përhapur dhe lufta ndaj tij është jetike:
“Korrupsioni është i shëmtuar në të gjitha aspektet, në gjyqësor, politikë, në administratën publike, që për fat të keq në Shqipëri ekziston. Korrupsioni për fat të keq ekziston në të gjitha vendet. Asnjë vend nuk e ka eliminuar tërësisht. Por në disa vende, si në Shqipëri, por ka edhe të tjerë në Europë, korrupsioni ka kapur nivele të mëdha në të gjitha sektorët, jo vetëm në gjyqësor. Pra duhet luftuar kundër korrupsionit në të gjitha nivelet”.
Sipas Gianni Buquicchios, korrupsioni mund të rrënohet përmes reformës në sistemin e drejtësisë shqiptare, ndërsa shtoi se është e nevojshme që ecet me hapa të shpejtë për zbatimin e saj:
“Pra u bë kjo reformë, një reformë shumë komplekse, ndoshta pak më shumë se komplekse, por siç duket ishte e nevojshme ky kompleksitet, duke parë situatën shqiptare, ku për fat jo të mirë mes opozitës dhe mazhorancës nuk ekziston besimi që duhet të jetë, dhe për pasojë u arrit në një përfundim, Kushtetuta u ndryshua. Tani ligjet e reformës kushtetuese duhen vënë në zbatim. Procesi i Vettingut nuk ka nisur ende, por është e rëndësishme të ecet me shpejtësi. Populli shqiptar nuk mund të presë më për të pasur gjykatës të pavarur dhe të paanshëm. Është thelbësore për shoqërinë shqiptare, për demokracinë në Shqipëri dhe për zhvillimin e ekonomisë”.
Presidenti i Komisionit të Venecias ka theksuar në këtë intervistë se përfitimet nga reforma në drejtësi janë të shumta, por në mënyrë të veçantë është zhvillimi ekonomik përmes investimeve të huaja në vend:
“Nëse nuk keni gjykatës të paanshëm, nuk do të keni investime të huaja, pasi një sipërmarrës nuk vjen këtu për të shpenzuar paratë e tij për të zhvilluar ekonominë shqiptare, se në rast konflikti nuk do të ketë një vendim të paanshëm nga ana e drejtësisë. Kjo për ekonominë, por edhe për qytetarët e thjeshtë, është e rëndësishme që gjykatësit të jenë të paanshëm, jo të korruptuar dhe të japin vendimet ashti siç duhet.”
