Kreu i Organizatës Botërore të Shëndetësisë, Tedros Adhanom Ghebreyesus paralajmëroi se koronavirusi “nuk është lodhur”.
Ai u bëri thirrje vendeve që të jenë të kujdesshme në adresimin e çështjes ndërsa ato raportuan sot një tjetër rekord të infektuarish dhe viktimash nga koronavirusi.
“Ne mund të jemi të lodhur nga COVID-19 por virusi nuk është lodhur nga ne. Vendet evropiane po luftojnë por virusi nuk ka ndryshuar ndjeshëm, as masat për ta ndaluar atë,” tha Tedros në Forumin e Paqes në Paris.
Sipas statistikave të Universitetit amerikan, Johns Hopkins 52 milion e 200 mijë njerëz në të gjithë botën janë të infektuar me koronavirus, dhe numri i të vdekurve ka arritur pothuajse 1 milion e 290 mijë.
Vendi më i prekur nga koronavirusi mbetet SHBA, me më shumë se 10 milionë raste dhe pothuajse 241,000 viktima, të ndjekura nga India dhe Brazili.
Sa i përket Europës, shteti më i goditur është Franca, e cila javët e fundit ka njohur një rritje të frikshme të infektimeve dhe vdekjeve duke detyruar qeverinë e Parisit të rifusë vendin në karantinë.
Të hënën, prodhuesi i barnave amerikane Pfizer dhe partneri gjerman BioNTech SE thanë se një vaksinë që ata po zhvillojnë ishte 90% efektive kundër COVID-19, bazuar në rezultatet fillestare nga prova e tij e madhe, në fazën e vonë.
