Komisioni i Strehimit pranë Bashkisë së Tiranës ka publikuar emrat e 938 banorëve të Tiranës që do të përfitojnë kredi të buta, nga lista e 2257 aplikantëve. Nga të gjithë aplikantët, vetëm 1165 persona kanë dorëzuar dokumentacionin e plotë. Emrat e tyre do të kalojnë këtë të mërkurë në mbledhjen e Këshillit Bashkiak. Kjo ishte hera e parë që Bashkia e Tiranës vendosi të shtojë programin e kredive të buta në listën e mekanizmave të strehimit për familjet në nevojë.
SKUALIFIKIMET
Edhe pse shumë persona u dyndën në dyert e baskisë, vetëm gjysma ishin treguar korrektë me dokumentacionin e kërkuar. Ka mjaftuar vetëm një mangësi e vogël në datë apo numrin e protokollit të një dokumenti shtetëror që një personi t’i skualifikohet dosja. Në tabelën përbri shkrimit janë listuar 13 elementet që i kanë bërë aplikantët jo fitues pas shqyrtimit të dokumenteve nga Komisioni i Strehimit.
Po ashtu ka pasur pasaktësi në emra, dosje të parregullta, mospërkime të aplikantit me emrin e kryefamiljarit e plot të tjera. Në listën e gjatë pasqyruar në relacionin që shkon të mërkurën e javës që vjen në Këshillin Bashkiak, nuk përjashtohen edhe rastet kur aplikantët kanë rezultuar me biznes të regjistruar dhe për më tepër nuk kanë sjellë asnjë dokument që provon të ardhurat. Pjesë e skualifikimit kanë qenë edhe pronarë.
“Nga vërtetimet e ZVRPP Tiranë apo ZVRPP të origjinës kanë rezultuar pronarë mbi normat e strehimit, komisioni i ka skualifikuar”, thuhet në relacion. Përcaktuese për të divorcuarit ka qenë dokumenti që vërteton të ardhurat shtesë për fëmijën.
Sipas marrëveshjes së bashkisë me bankën e nivelit të dytë, kjo e fundit lëvron deri në 80% të shumës totale të apartamentit në varësi të kërkesës që ka bërë përfituesi, i cili duhet të paguajë këstet mujore me interes 3%, ndërsa pjesën tjetër të interesave e mbulon bashkia (e cila për 3 vitet e para e ka falas).
Ata që e gjejnë veten në listën e përfituesve të kredisë së butë, por njëkohësisht trajtohen me një tjetër program strehimi nga bashkia, duhet të bëjnë zgjedhjen e tyre. Përfituesit e dyfishtë kanë dhjetë ditë kohë të heqin dorë nga njëri program, ose në të kundërt, përfituesi i kredituar nga banka humbet të drejtën e përfitimit nga programi tjetër.
