Komisioni Qendror i Zgjedhjeve ka dalë me një njoftim, teksa pas disa muajsh do të mbahen zgjedhjet vendore.
Zëdhënësja e KQZ-së, Drilona Hoxhaj u bëri thirrje partive që të regjistrohen në këtë proces, ndërsa afati për regjistrimin që iu është lënë në dispozicion partive është 21 prilli.
Për sa i përket regjistrimit të koalicioneve, KQZ ka lënë afat të fundit 1 majin, ndërsa deri më 13 maj duhet të dorëzohen listat me kandidatë për këshilltarë.
Mes të tjerash KQZ bën me dije se fushata zgjedhore do të nisë më 31 maj, ndërsa paralajmëron partitë që të mos nisin fushatën para kësaj date. Po ashtu KQZ paralajmëroi partitë se do të merren sanksione ndaj tyre nëse nuk respektohet transparenca në lidhje me financimet.
