Kryetari i KQZ, Klement Zguri, ka paralajmëruar kryetarët e Bashkive dhe përgjegjësit e zyrës së gjendjes civile, se do të përballen me ligjin nëse organizojnë regjistrim fiktiv për zgjedhjet e 30 qershorit. Në një dalje për mediat, Zguri tha se ky fenomen, i cili është vërejtur në zgjedhjet e kaluara, është lehtësisht i verifikueshëm dhe do të monitorohet. Ai i mëshoi fort faktit se ndryshimi artificial i banimit, përbën shpërdorim të pastër detyre, por ka pasoja të rënda edhe në sistemin demokratik, sepse cënon raportin e zgjedhësve me pushtetin e zgjedhur.
“Në proceset e mëparshme zgjedhore, jo vetëm vëzhguesit, por edhe KQZ ka konstatuar se në disa Bashki të vendit, është përhapur transferimi i fenomenit artificial të vendbanimit të mbështetësve të atyre që kandidojnë për kryetar Bashkie, me qëllim ndikimin e paligjshëm mbi rezultatin e votimit nëpërmjet votave të këtyre votuesve artificiale.
Ndryshimi artificial i banimit përbën shpërdorim të pastër detyre, por ka pasoja të rënda edhe në sistemin demokratik, sepse cënon raportin e zgjedhësve me pushtetin e zgjedhur.
Ky fenomen i kundraligjshëm lë gjurmë, ndaj është i verifikueshëm lehtësisht. Është e lehtë të konstatohet se kur në një apartament figurojnë 10-20-30 familje, atëherë në këtë bashki kryetari i Bashkisë dhe përgjegjësi i zyrës së gjendjes civile kanë organizuar në bashkëpunim zhvendosjen artificiale të zgjedhësve.
Auditët e KQZ do të merren me investigimin e këtij fenomeni, KQZ do të kallëzojë penalisht kryetarët e Bashkive dhe përgjegjësit e zyrave të gjendjes civile, kurdoherë që do të vihet përballë këtyre fakteve”.
Zguri i bëri thirrje Ramës dhe Bashës që të deklarohen kundër këtij fenomeni. “Ndaj unë ftoj lidershipin e mazhorancës dhe opozitës, të deklarohen kundër, me qëllim që ti heqin çdo mbështetje politike fenomenit”.
