Familjarët e të zhdukurve dhe viktimave të luftës shprehen të pakënaqur me angazhimin e institucioneve të vendit dhe atyre ndërkombëtare për zbardhjen e fatit të familjarëve të tyre.
Ata thonë se ekzekutuesit nuk u nxorën asnjëherë para drejtësisë, ndërsa e konsiderojnë një padrejtësi që po u bëhet nga shteti. Have Pajaziti nga Dobroshi i Gjakovës , tashmë rreth të 90 –tave, më 27 prill 1999 ka humbur 8 anëtarë të familjes, katër djemë ,dy nuset dhe dy mbesa të vogla të cilët i ka rivarrosur në lëndinën e pikëllimit në Meje.Vetëm Idrizi ,njëri nga katër djemtë e saj ende vijon të jetë i zhdukur-shkruan RTK.
Dhimbja e rëndon edhe më shumë sepse kriminelët që kryen këtë akt makabër nuk u sollën asnjëherë para drejtësisë.Nesrete Kumnova , familjare dhe aktiviste e zbardhjes së fatit të të zhdukurve,ka shprehur pakënaqësinë e madhe në emër të të gjitha nënave që gjatë luftës humbën më të dashurit e tyre ndërsa ekzekutuesit e tyre, nuk u nxorën asnjëherë para drejtësisë.
Ajo thotë se është e habitur se si është e mundur të ndodhë një gjë e tillë, kur kanë kaluar pothuajse dy dekada nga zhdukja e familjarëve.
Vetëm në komunën e Gjakovës gjatë luftës së fundit 98/99 janë vrarë dhe masakruar mbi 750 qytetarë. Përderisa në nivel vendi ky numër shkon në rreth 6000 persona. Ndërsa drejtësia për këto krime duket se e ka humbur edhe kuptimin thonë familjarët e tyre.
