Marrëveshja e Demarkacionit me Malin e Zi nuk do të dalë në votim gjatë këtij viti. Teksa kanë mbetur vetëm pak ditë nga ardhja e vitit të ri, shanset janë minimale që Demarkacioni të procedohet në Kuvend.
Sipas njohësve të çështjeve politike, marrëveshja nuk do të kalojë për votim pa u gjetur më parë një konsensus mes partive.
Këtë gjë e kanë konfirmuar edhe anëtarët e Kryesisë së Kuvendit nga PDK-ja, të cilët pohuan se nëse nuk arrihet një marrëveshje e tillë, atëherë nuk ka nevojë që Demarkacioni të dalë në votim pasi do të diheshin rezultatet e tij.
Kështu, ata thonë se zhvillime për çështjen e Demarkacionit, çështje kyçe për integrimin e Kosovës, do të ketë në vitin 2018.
Marrëveshja nuk është shqyrtuar ende as nga Komisioni për Punë të Jashtme, ndërsa pritet që kjo të ndodhë në fund të këtij muaji, më 26 dhjetor.
Nga ana tjetër, ndërsa përfaqësuesit e opozitës (nga LDK-ja) thonë se kjo marrëveshje është politizuar, ata të lëvizjes ‘Vetëvendosje’ ripërsërisin se nuk do ta pranojnë versionin aktual.
Edhe kryeministri Haradinaj vazhdon të insistojë se versioni i tanishëm është i gabuar, ndërsa Mali i Zi ka bërë thirrje për ratifikimin e Demarkacionit, duke e cilësuar këtë si një çështje të mbyllur.
