Në Kosovë do të vazhdojnë me reduktime të energjisë elektrike, derisa të stabilizohet situata. Me anë të një deklarate për mediat, Operatori i Sistemit, Transmisionit dhe Tregut të energjisë elektrike në Kosovë – KOSTT, njofton se instruksionet për reduktimet e energjisë elektrike do të jenë në fuqi deri në stabilizimin e situatës elektroenergjetike në vend.
Pamjaftueshmëria e furnizimit me energji elektrike është dhënë si arsye nga ana e KOSTT. Referuar intervaleve kohore të reduktimeve të energjisë elektrike, sipas KOSTT, ato mund të dallojnë nga dita në ditë në varësi të konsumit dhe nga energjia e siguruar nga palët përgjegjëse.
“Njoftohen qytetarët e vendit që sipas masave dhe procedurave operative për balancim të Sistemit Elektroenergjetik të Kosovës, në kushtet e pamjaftueshmërisë së furnizimit që parashihen me Kodin e Rrjetit, instruksionet për kufizim të furnizimit mbesin në fuqi deri në stabilizimin e situatës”.
“Gjendja e krizës energjetike me të cilën po përballet Sistemi Elektroenergjetik i Kosovës e cila ndër të tjera është reflektim i krizës globale energjetike, do të përballohet më me lehtësi me mbështetjen edhe të të gjithë qytetarëve duke shfrytëzuar energjinë elektrike në mënyrë sa më racionale dhe duke kursyer aty ku është e mundur”.
