Procesi i numërimit të votave në Kosovë po shkon drejt përmbylljes. Referuar 91,00% të vendvotimeve të procesuara nga KQZ, koalicioni i 13 partive shqiptare – PDK, AAK, Nisma dhe 10 forca të tjera, ka 34,60% të votave, Lëvizja Vetëvendosje që garoi e vetme ka 26,75%, ndërsa koalicioni i LDK dhe AKR ka 25,81% të votave.
Nga subjektet e komuniteteve pakicë, më shumë vota ka Iniciativa Qytetare Lista Serbe (Građanska Inicijativa Srpska Lista), 5,54%.
Që nga ora 2:34 minuta kur është bërë përditësimi i votave online, faqja e KQZ-se nuk ka funksionuar dhe ende nuk ka arritur që të përditësojë në 100 për qind të dhënat nga qendrat e votimit.
Sipas Komisionit Qendror të Zgjedhjeve, pjesëmarrja në votime ishte 41.45 për qind, ndërsa të drejtë vote kanë pasur mbi 1 milion e 872 mijë.
Zgjedhjet në Kosovë janë vëzhguar nga më shumë se 29 mijë vëzhgues nga partitë politike, organizatat joqeveritare, nga Bashkimi Evropian si dhe ambasadat e akredituara në Prishtinë.
