Sokol Halili, i dyshuari për vrasjen e gruas shtatzënë, mësohet se ka vrarë veten. Ministri i Punëve të Brendshme, Xhelal Sveçla, në një postim në Facebook shkruan se Policia e Kosovës si dhe Inspektorati Policor i Kosovës do të vazhdojnë hetimet për zbulimin e të gjitha rrethanave të vrasjes së gruas shtatzënë.
“Pas një pune intensive të të gjitha njësiteve të Policisë së Kosovës është arritur që të lokalizohet vendndodhja e vrasësit Sokol Halili. Përkundër tentativës së zyrtarëve policor që të negociojnë dorëzimin, dorasi vret veten. Policia e Kosovës si dhe Inspektorati Policor i Kosovës do të vazhdojnë hetimet për zbulimin e të gjitha rrethanave të vrasjes së gruas shtatzënë dhe vetëvrasjes së dorasit”, shkruan Sveçla.
Sokol Halili ishte në kërkim që prej të mërkurës në mbrëmje, kur qëlloi për vdekje ish-bashkëshorten 35-vjeçare Hamide Magashi. E ndjera, e cila ishte në muajin e 9 të shtatzënisë, u përcoll këtë të premte për në banesën e fundit.
35-vjeçarja ishte ndarë nga Halili vetëm 3 muaj pas martesës, për shkak të dhunës së vazhdueshme që ai ushtronte.
