Xherdan Shaqiri dhe Granit Xhaka pasi i shënuan Serbisë në Botërorin e Rusisë, festuan duke bërë shqiponjën me duar. Gjest që krijoi jo pak probleme për ata, pasi FIFA i dënoi me një gjobë monetare. Por tashmë duket se ajo mënyrë feste është bërë hit dhe po praktikohet nga të gjithë shqiptarët që jetojnë jashtë vendit dhe luajnë për vendet e huaja.
Rasti më i fundit është në futbollin e femrave dhe është Kosovare Asllani që është bërë pjesë e mediave në Suedi. Lojtarja me origjinë kosovare, ka shënuar gol në fitoren 3 me 0 të Suedisë në ndeshjen me Ukrainën e vlefshme për kualifikueset e Kampionatit Botëror.
Asllani shënoi një gol mjaft të bukur, por përveç tij bujë në media bëri edhe festa me shqiponjë që ajo bëri. Një gjest në dukje i guximshëm, pasi futbollistët janë informuar nga FIFA që “shqiponja” nuk mund të përdoret si mënyrë festimi sepse e cilësojnë si provokim. Ndërsa në lidhje me festimin e saj ajo ka thënë për “SVT Sport”: “Të gjithë e dinë që kjo ishte shqiponja e Shqipërisë dhe e Kosovës, kështu që është një mesazh dhe një nder për këtë vend.
Ishte speciale. Nipi im tashmë ka mësuar ta bëjë shqiponjën dhe e kam bërë edhe për të. Jo, vërtet jo. Ata ishin më të vendosur dhe më entuziazmuar duke e pasur parasysh ekipin kundërshtar”- tha Asallani në lidhje me krahasimin që i bënë festimit të saj me të Xhakës e Shqirit.
