FIFA ka publikuar renditjen e kombëtareve për muajin dhjetor dhe është Belgjika që vazhdon të jetë numri 1, duke lënë Francën pas edhe pse u shpall kampione bote. Por pavarësisht kësaj Franca është skuadër për rekord, pasi ka arritur të rikuperojë plot 165 pikë në renditje, që nuk kishte ndodhur më parë.
Në renditjen e ekipeve që kanë grumbulluar më shumë pikë në harkun e një viti Uruguai është i dyti, me 151 pikë të grumbulluara këtë vit, ndërsa e treta është surprizë gjigante, sepse bëhet fjalë për Kosovën, që e mbyll vitin si e 131-ta në botë, por me 133 pikë të fituara vetëm këtë vit.
Pikërisht Kosova është kombëtarja që ka vendosur rekordin e vendeve të fituara në renditje, sepse ka ngjitur plot 46 vende brenda një viti.
Europa dominon renditjen e FIFA-s, me 31 kombëtare në 50-shen e parë. Ngjitet Azia, që ka 3 vende mes 50 të parave, ndërsa Afrika është në rënie, me vetëm 5 ekipe në 50-shen e parë, ndryshe nga një vit më parë, kur kishte 8 kombëtare.
Shqipëria e ka mbyllur vitin në vendin e 60-të në botë. Ishte një vit i dështuar për kombëtaren kuqezi, por gjithsesi një vit më parë në këtë kohë ishim në vendin e 62-të në botë, ndaj ka edhe më keq. Natyrisht, duhet pasur parasysh edhe ndryshimi i rregullores së FIFA-s për hartimin e renditjes, sepse këtë vit janë vendosur kritere të reja.
