Ministria e Diasporës në Republikën e Kosovës publikoi shifrat e qytetarëve të saj që jetojnë si emigrantë nëpër botë. Rreth 350 mijë është numri i qytetarëve të Kosovës që jetojnë në vende të ndryshme të Evropës dhe botës.
Nga shifrat e publikuara rezulton se po t’i shohim të ndarë sipas gjinisë në Diasporë jetojnë rreth 56 për qind meshkuj, kurse 44 për qind femra. Këtë qytetar të Kosovës janë të ndarë në kryesisht në Gjermani, Zvicër, pastaj në Itali, Suedi dhe Kanada.
Ministri i Diasporës në Qeverinë në largim të Kosovës, Valon Murati, ka treguar se procesi i regjistrimit i diasporës, ka filluar në janar të vitit 2014 në formën elektronike dhe në formën me pyetësor, ndërkaq ka përfunduar në fund të vitit të kaluar.
Ndërkohë, Murati, ka thënë se, “ Diaspora edhe sot vazhdon të jetë burim i rëndësishëm i jetës socio- ekonomike të vendit, qoftë përmes remitencave, përmes shpenzimeve për udhëtim dhe investimeve në Kosovë” .
Sipas të dhënave të Bankës Qendrore të Kosovës, thotë Murati, për çdo vit nga këto tri kategori, në Kosovë hyjnë rreth një miliard e 500 mijë euro.
Ministria e Diasporës, të shtunën ka hapur fushatën sensibilizuese për regjistrimin elektronik, që do jetë aktive deri në vitin 2021, kur do të publikohen rezultat përfundimtare të regjistrimit të Diasporës.
