Gazetari shqiptar i emisionit “Le Iene”, Taulant Kopliku, i cili mundësoi takimin e Alvin Berishës dhe babait të tij në kampin Al Hol, ka treguar tmerret që ka përjetuar 11-vjeçari shqiptar.
Në një komunikim për “News24”, Kopliku u shpreh se për ditë me radhë në Siri, vogëlushi është ushqyer vetëm me fije bari. Këtë detaj ia ka treguar babait të Alvinit, një grua kosovare e cila kishte marrë 11-vjeçarin pas bombardimit ku humbi jetën nëna e tij, Valbona.
“Ato 10 ditë kanë qenë ditë të tmerrshme për atë fëmijë, pasi ishte i plagosur. Kishte rrjedhje gjaku. Janë transportuar në disa zona ku ka pasur stane bagëtish. Janë ushqyer me gjethe dhe bar për 10 ditë me radhë. Gjëja që i ka thënë ajo grua ishte se: ‘ky fëmijë nuk është ankuar kurrë’. Ai ishte i vendosur që të vazhdojnë rrugën me ta”, tha Taulant Kopliku.
Mes të tjerash, gazetari tregoi se autoritetet shqiptare kanë shfaqur një interes të varfër për të kontaktuar me kurdët, me qëllim largimin nga atje të shtetasve shqiptarë.
“Gazetari Kopliku thotë se kurdët janë të gatshëm për t’i larguar nga kampi gratë dhe fëmijët, por shteti shqiptar nuk ka shprehur interesim. “Problemi është që të gjendet gjuha me autoritet kurdë. Shoh që ka një vullnet të varfër nga autoritetet shqiptare për të kontaktuar me kurdët. Arsyeja është gjeopolitikë e pastër. Nëse nga një aleat politik siç është Turqia, ato konsiderohen terroristë, në një farë mënyre janë terroristë dhe për shoqërinë shqiptare”, tha Kopliku.
