Policia kreu një kontroll mesditën e së shtunës në Lanë, përballë zonës së njohur si “Piramida”, për të gjetur armën e krimit me të cilën u ekzekutua 66 vjeçari Behar Sofia më 25 shkurt 2021! Burime policore bëjnë të ditur se një prej të arrestuarve të grupit të akuzuar për vrasjen e biznesmenit Behar Sofia, Xhuljano Visha, i ka rrëfyer policisë se arma e krimit ishte hedhur në Lanë, në zonën ku u krye vrasja.
Sipas të njëjtave burimeve mësohet se Visha, ka luajtur rolin e ndërmjetësit në vrasje. “Visha kishte telefonuar autorin e krimit, Ernejt Shyti, duke i premtuar shumën prej 50 mijë eurosh për vrasjen e Sofisë”, thanë burime policore. Gjetja e armës do të shtonte të dhënat mbi krimin e kryer 16 ditë më parë në qendër të Tiranës, kur Sofia sapo kishte konsumuar kafenë dhe po ecte në këmbë në trotuarin në krah të Lanës, vetëm pak metra larg Urës së Madhe në kryeqytet.
Kush është Xhuljano Visha?
I akuzuari si ndërmjetës në vrasjen e Sofisë, Xhuljano Visha, rezulton një emër i njohur për policinë shqiptare, pasi rezulton i dënuar më parë për veprën penale të vjedhjes. Ndërkohë, emri i Vishës lidhet me një krim të ndodhur tetë vite më parë, më 13 gusht 2013, kur kushërira e tij, Nazime Visha, qëlloi mbi Fiqiri Muçën, i njophur si abuzuesi i saj. Nazime Visha, e lindur në Zall Bastar më 3 mars 1994, vrau babanë e 5 fëmijëve 4 vjet pas lidhjes intime që kishte patur me të. Policia gjeti 29 gëzhoja automatiku në vendin e ngjarjes. Hetimet zbulkuan se a ishte përdhunuar prej moshës 14 –vjeçare nga Muça, që njihje edhe si mik i familjes Visha. Ajo u dënua me 10 vjet burg, prej të cilave kreu vetëm 4 vjetësh, pasi u fal nga Presidenti i Republikës, me propozim të Ministrit të Drejtësisë.
Kush ishte Behar Sofia?
Behar Sofia, i njohur edhe me emrin Fatmir Sofia, u vra me dy plumba me silenciator dhe ndërroi jetë në spital në mesditën e 25 shkurtit. “Ky emër del në ngjarjen e gushtit 2009 ku në Durrës u vranë 4 policë gjatë operacionit për të arrestuar Dritan Dajtin. Disa herë bizneseve të tij i është vënë lëndë eksplozive – biznese që i ka pasur afër stadiumit Dinamo në Tiranë, tashmë nuk i ka më,”- tha menjëherë pas vrasjes gazetari investigativ Artan Hoxha. Madje Hoxha e cilësoi atë si “Padrino i drogës”. Pista e konflikteve për prishje të pazareve të drogës ka qenë, sipas policisë, pista kryesore e hetimeve për Sofinë.
Zbulimi i vrasësve
Policia njoftoi se ka mundur të arrestojë katër persona për vrasjen e Sofisë. Ernejt Shyti, 24 vjeç, lindur dhe banues në Tiranë, Skënder Vathi, 54 vjeç, lindur në Arrameras, Fushë Krujë dhe banues në Tiranë, Leonar Xhixha, 30 vjeç, lindur dhe banues në Arrameras, Fushë – Krujë, i dënuar më parë për veprën penale “Vrasja me paramendim” ngelur në tentativë, Xhuljano Visha, 28 vjeç, i dënuar më parë për veprën penale “Vjedhja”.
Në deklaratan zyrtare të Policisë tuhet se Shyti, i cili ka pasur rolin e ekzekutorit në këtë ngjarje, menjëherë pas kryerjes së ngjarjes është larguar në drejtim të Malit të Zi. Gjithashtu mësohet se, organizatori i atentatit ka qenë 54-vjeçari nga Fushë Kruja Skënder Vathi, ndërsa Leonar Xhixha dhe Xhuljano Visha i kanë premtuar që ti japin Shytit 50 mijë euro për kryerjen e krimit. Në fazën operacionale nga grupi hetimor janë sekuestruar prova të shumta materiale si automjete, aparate telefonike, karta sim etj, që sipas Policisë mund të ndihmojnë në gjetjen e personave të tjerë që mund të jenë implikuar në këtë ngjarje.
Por, edhe pse janë arrrestuar katër persona, ajo që vijon të mbetet e panjohur është porositësi për vrasjen e biznesmenit 66-vjeçar, i cili është një personazh me mjaft dritëhije. Ai ka qenë i dyshuar për trafikimin e heroinës nga Turqia drejt Shqipërisë dhe prishja e pazareve të drogës është pista kryesore e hetimit. Sipas policisë, Shyti, që ka pranuar autorësinë e vrasjes, ka thënë se gjithçka e kishte bërë për para. Burimet hetimore bëjnë të ditur se komunikimet e Shytit mund ta çojnë grupin hetimor drejt zbulimit të porositësve të vrasjes.
Policia njoftoi se 24-vjeçari kishte punuar për disa muaj si bojaxhi në Malin e Zi, ku dhe më pas u largua të nesërmen e ngjarjes. Por, siç mësohet nga hetimet e para, ajo që e nxori zbuluar ishin gjurmët e ADN-së që kishin mbetur në rrobat e tij që la pranë Liqenit Artificial, pak orë pas ngjarjes.
