Parlamenti i ka lënë si detyrë për këtë vit ERE-s dhe OSHEE-së, që të nisin procedurat, për të mundësuar mënyrën e re të faturimit. Konsumatori familjar do të ketë lexim të sahateve të tij një herë në tre muaj, ose një herë në gjashtë muaj. Operatori i Sistemit të Shpërndarjes së Energjisë, në kontratën e re, do t’u lërë si mundësi qytetarëve të zgjedhin nëse duan të faturohen sipas modelit të ri, ose me faturimin aktual.
Për secilin familjar do të krijohet një historik i konsumit të energjisë dhe në bazë të tyre, ata do të paguajnë një shumë fikse energjie çdo muaj. Për rrjedhojë, në muajin e tretë, kur do të bëhet matja e energjisë së harxhuar, në rast se familjari ka konsumuar më pak, atëherë OSHEE do t’ia rimbursojë këtë shumë në faturën e muajve të tjerë. Modeli i ri i faturimit është vendosur në rezolutën e miratuar nga Kuvendi, për vitin 2018.
“Të nxisë OSHEE-në për vënien sa më shpejt në punë të sistemit të ri të faturimit, i cili lehtëson në mënyrë të ndjeshme matjen e energjisë dhe krijon mundësi dhe opsione të reja të nevojshme, duke përshirë edhe matjen periodike disa mujore, si dhe përfshirjen në kontratën tip për vitin 2019 të kësaj mënyre matjeje”, thekson rezoluta e miratuar në Kuvend.
