Një tjetër rast i veprimtarisë kriminale të kontrabandës është goditur në Sarandë.
Konkretisht, është sekuestruar një kamion me targa AA 537 OF tip “Benz”, me të cilin bëhej kalimi i mallrave në Shqipëri.
Po ashtu, në brendësi të kamionit janë sekuestruar nga Policia në cilësinë e provës materiale rreth 140 thasë me veshje, 9 televizorë, si edhe sende shtëpiake si lavatriçe, dollape, dyshekë, tapete etj.
Autorët e kësaj veprimtarie janë shtetasit K.S., S.M., (shoferë të kamionit) dhe A.C., E.D., (doganier në PKK Qafë-Botë), të cilët kanë bashkëpunuar dhe kanë lejuar kalimin dhe futjen e këtyre mallrave pa i deklaruar në Pikën e Kalimit të Kufirit shqiptar.
Këta të fundit janë shpallur në kërkim nga policia, pasi kanë arritur të largohen në momentin kur kanë kuptuar se Policia po zhvillonte një hetim dhe u ishte vënë në ndjekje.
Po vijon puna për kapjen dhe ndalimin e shtetasve të shpallur në kërkim si edhe për zbardhjen dhe dokumentimin ligjor për të tjera raste të veprimtarisë kriminale të kontrabandës. Materialet iu referuan Prokurorisë për veprën penale “Kontrabanda me mallra të tjerë”.
