Rektori i Universitetit të Tiranës, Mynyr Koni është rikthyer në detyrë pas tre javësh pezullim, pas vendimit të Ministres së Arsimit, Besa Shahini.
Por, presidenti rrëzoi kërkesën e Shahinit për shkarkimin e Konit, ndërsa ky i fundit vlerësoi maksimalisht Metën, teksa tha se ka mbajtur një qëndrim prej shtetari.
Koni tha për Ora News se është i gatshëm për bashkëpunim me ministren e Arsimit, Besa Shahini, duke shtuar se është “i hapur dhe vazhdimisht për bashkëpunim dhe se nuk cenon asgjë në marrëdhënien e tij me ministren e Arsimit apo çdo strukturë tjetër për t’u zhvilluar Universiteti i Tiranës”.
“Dekretin e presidentit dhe relacionin shpjegues të tij e vlerësoj maksimalisht. Një qëndrim shtetari me përmasat e një politikani, i cili e ka treguar gjatë gjithë kohës së tij. Mbrojti dhe siguroi autonominë institucionale dhe garantoi lirinë akademike, të drejtat e fituara nga ana kushtetuese. Kështu që në emrin tim personal, të stafit akademik të studentëve të UT-së e vlerësoj maksimalisht. Nga ana tjetër e garantoj presidentin dhe gjithë strukturat e universitetet që do të punoj në përkushtueshmëri në zbatim të ligjit”, ka thënë Koni.
