Ish-sekretari i Përgjithshëm i MAS, Plarent Ndreca i është drejtuar kryeministrit Rama me një letër lidhur me konfliktin e vazhdueshëm me ministren teknike, Mirela Karabina.
Ndreca shpreh shqetësimin e tij teksa pretendon se Karabina është kthyer në uzurpuese të institucionit duke ushtruar dhunë verbale dhe psikologjike ndaj punonjësve.
“Në 20 ditë detyrë, Karabina ka bërë 25 shkelje. Ajo ka denigruar figurën e ministrit dhe vijimi i paligjshmërisë, është dëm për shtetin,” shkruan ai.
Ditën e djeshme, Drejtoria Vendore e Policisë Tiranë është njohur jo zyrtarisht me konfliktin institucional ndërmjet Ministrit dhe Sekretarit të Përgjithshëm të MAS, ndërsa zgjidhja e kësaj situate pohoi se nuk është detyrë e strukturave policore dhe kompetencë e saj.
“Policia e Shtetit ju ka bërë me dije zgjidhjen e situatës duke ju drejtuar Gjykatës Administrative dhe Prokurorisë. Për sa i përket shërbimit të sigurisë fizike, të dy shoqëritë janë kontraktuar nga i njëjti institucion”, thuhet në reagimin e policisë.
