Ka përfunduar pas 40 minutash Konferenca e Kryetarëve e mbledhur nga kryetari i Kuvendit, Gramoz Ruçi.
Pas mbledhjes, kreu i grupit parlamentar të PD-së, Edmond Spaho shtroi edhe një herë kërkesat e PD-së, teksa theksoi shqyrtimin e kërkesës për referendum për mbetjet, si dhe kërkoi mos shkurtimin e stafit dhe pagave.
“Kërkojmë plotësimin e kërkesave tona. Duhet të shqyrtohet kërkesa për referendumin për mbetjet. Ne do të paraqesim amendamente për organet e Vetting-ut. Gjithashtu kërkojmë të mos ketë shkurtim të stafit dhe pagave,” tha Spaho.
Pas deklaratës së Spahos, edhe Taulant Balla ka dhënë një deklaratë për mediat, ku tha se tryeza politike duhet të mblidhet pa kushte dhe në shërbim të integrimit të vendit në BE:
“I kam rishprehur PD-së dëshirën tonë për të institucionalizuar një ditë e më parë një tryezë politike e cila të adresojë të gjitha çështjet që na bashkojnë, por edhe ato që na ndajnë, por që duhet të na bashkojnë në interes të integrimit evropian.
Kjo tryezë duhet të përfaqësohet nga partitë kryesore me qëllim që ne të fillojmë të identifikojmë gjëra që na bashkojnë, edhe reforma zgjedhore. PD ka të drejtën e saj për të avancuar çështje, por PS nuk mund të jetë shtojcë e agjendës funksionale të PD-së. E vetmja gjë që nuk bëhet me kusht, është bashkëpunimi.
Këto çështje që na interesojnë, duhet t’i adresojmë. Basha, në frymën e këtij bashkëpunimi duhet të mblidhet për këtë interes madhor, siç është integrimi në Bashkimin Evropian”, tha Balla.
