Dhoma Ndërkombëtare e Tregtisë në Shqipëri (ICC) me përfaqësues të biznesit në vendin tonë zhvilloi një takim me biznesin vendas ku në qendër të bisedimeve ishte diplomacia ekonomike dhe bashkëpunimi potencial publik-privat.
Gjatë takimit të mbajtur në Tiranë u diskutua edhe mbi rolin kryesor mbështetës të dhomave në detyrat e diplomacisë ekonomike.
Drejtuesit e dhomave të huaja të tregtisë, theksuan se lehtësimi i aksesit të kompanive shqiptare në tregjet e huaja, tërheqja e investimeve të huaja në vend dhe nxitja e njohurive mbi zhvillimet dhe rregullat ndërkombëtare, është bërë edhe më e rëndësishme në ditët e sotme.
Ky rol, sipas tyre, është i një rëndësie të veçantë në dhënien e mesazhit të duhur ndaj palëve përkatëse dhe përmirësimin e qëndrueshëm të imazhit të klimës së biznesit të vendit.
Më tej u diskutuan edhe disa nga problemet që hasin dhomat e tregtisë ose zyrat e tregtisë në ambasada në sigurimin dhe shpërndarjen e informacioneve relevante për komunitetin e biznesit të huaj dhe atë vendas.
Gjithashtu, u theksua se duhet punuar krah për krah, duke mbajtur komunikim të vazhdueshëm midis dhomave dhe forcuar dialogun me institucionet publike.
