Seanca e sotme në Komisionin e Sigurisë është shoqëruar me tensione, teksa deputeti socialist Paulin Sterkaj i është kthyer keq kryetares së këtij komisioni, Ermonela Felajt.
Teksa u zhvillua seanca dëgjimore lidhur me masat e marra për zbatimin e ligjit “Për masat shtesë të Sigurisë Publike”, Sterkaj ka ngritur shqetësimin e tij se përse nuk kapen autorët e grabitjeve, pavarësisht pranisë së kamerave në biznese të ndryshme.
“Një gjë nuk kuptoj, kush ma shpjegon, si ka mundësi që nuk kapen autorët e grabitjeve edhe pse ka kamera në vendngjarje? Shohim përditë raste të tilla”, tha Sterkaj.
Ndonëse pritej që në seancë të raportonte drejtori i Policisë së Shtetit Reban Jaupaj, para deputetëve të Komisionit është paraqitur drejtori i Komanduar në Policinë e Elbasanit, Altin Qato, gjë që ka shkaktuar irritim te deputeti socialiste, e më pas edhe përplasje mes Sterkajt dhe Felajt.
Stërkaj: Është kërkuar që të vijë drejtori i Policisë së Shtetit, përse nuk ka ardhur? Edhe ti (i drejtohet Felajt) duhet të jesh më serioze, nuk mund të vijë dikush tjetër. Janë mbi 11 mijë policë, nuk mund të vijë një nga ata 11 mijë…
Felajt: A ka mundësi…
Stërkaj: Jo, s’ka hiç mundësi pa mbaru!
Felaj: Nuk të ka ardh njeri me zor…
Stërkaj: Me zor nuk më vjen njeri mua këtu!
Ndërkohë, lidhur me shqetësimin për moskapjen e grabitësve nga Policia e Shtetit, Qato u përgjigj:
Jo se identifikohen dhe nuk kapen. Policia punon në identifikimin nëpërmjet kamerave funksionon, por herë pas herë duan kohën e vet për të përcaktuar qartë kush është personi. Në shumë raste objektet që kanë montuar kamerat nuk kanë cilësi të lartë për të bërë paraqitje të qartë të autorit, ndaj kemi përcaktuar në ligj që të rritet cilësia e kamerave.Kemi përcaktuar një sërë objektesh që janë në risk në këtë ligj që të vendosin kamera për leximin optik të targave, në shumë raste mjetet fiksohen por janë të paidentifkueshme targat për shkak të cilësisë së ulët.
