Tashmë Kombinatit i është shtuar një tjetër shkollë, e cila do të shfrytëzohet nga 1200 nxënës. Bëhet fjalë për shkollën “Betim Muço”, e cila u përurua sot nga kryebashkiaku Erion Veliaj. Kjo shkollë e re zgjidh përfundimisht problemin e mësimit me dy turne në Kombinat.
“Jam shumë i lumtur që më në fund ky projekt u bë realitet. Kemi një mundësi fantastike që ta nderojmë Betimin, jo me fjalime, jo me patetizma, jo me pllakata, por me një institucion, i cili me gjasë do të frymëzojë nesër djem dhe vajza të shkëlqyer, që do të rriten me dashuri në një ambient të ngrohtë, nga mësues që do të investojnë shpirtin, zemrën, dijet e tyre për ta”, tha Veliaj.
Këtë vit janë hapur nga Bashkia katër shkolla të reja: shkolla “Betim Muço”, shkolla “Hasan Tahsin”, Shkolla e Baletit dhe shkolla “Ardian Klosi” te Bregu i Lumit.
Kryebashkiaku ftoi të rinjtë dhe komunitetin e zonës së Kombinatit që pas orarit të mësimit, të shfrytëzojnë ambientet e shkollës së re për aktivitete të ndryshme sportive dhe social-kulturore.
Marta Muço, bashkëshortja e poetit Betim Muço, vlerësoi kontributin e Veliajt për përfundimin në kohë rekord të punimeve për ndërtimin e kësaj shkolle.
Shkolla e re 9-vjeçare “Betim Muço” ka 27 klasa dhe 6 laboratorë, dhe do mbulojë nevojat e 1200 nxënësve. Gjithashtu, shkolla ka një palestër dhe 3 terrene sportive të jashtme, të cilat përveç shkollës, do t’i shërbejnë gjithë zonës së Kombinatit.
