‘‘Edi Rama nuk do të mundë të qeverisë i vetëm’’. Ky është paralajmërimi që bën kreu i Lëvizjes ‘‘Zgjidhja’’, Koço Kokëdhima.
Ish-aleati i Edi Ramës, e bazon këtë konstatim nisur nga numri i mandateve, të cilat sipas tij nuk prodhojnë dot stabilitet politik, por veçse një qëndrueshmëri të rrejshme politike.
“Sigurisht Rama mund të ndihet më komfort, por mund të ndihet edhe keq, pasi në këto zgjedhje luajtën rol blerjet e votave. Edhe pse me 74 mandate, PS nuk do qeverisë e vetme, pasi shumica e tillë duket sikur prodhon një stabilitet, por është një stabilitet i rremë. Këto zgjedhje nuk i kanë kuruar plagët e Shqipërisë, as plagët e zgjedhjeve, as plagët e ekonomisë, por vetëm sa i kanë mbuluar ato. Unë nuk pres që këto zgjedhje të prodhojnë stabilitet në qeveri. Këto janë zgjedhje të kontestuara dhe të anatemuara”- u shpreh Kokëdhima në emisionin ‘‘Këtë Javë’’, në Neës 24.
Zgjedhjet
Sa i përket zgjedhjeve të fundit parlamentare të 25 qershorit, Kokëdhima vuri në dukje se ky ishte procesi më i dështuar që nuk solli asnjë progres politik.
“25 qershori shënoi zgjedhje pa asnjë progres. Ishin zgjedhjet më të këqija se ato të kaluarat dhe me standardet më të ulëta. Kjo provoi se ne kishim të drejtë për të refuzuar këto zgjedhje. Duke qenë se ishin zgjedhje pa standarde dhe nuk do sillnin ndonjë gjë të re, ato nuk do prodhonin zgjidhje për popullin. “Zgjidhja” bojkotoi këto zgjedhje dhe ftoi edhe popullin për bojkot’’, shpjegoi Kokëdhima.
Bojkoti
Kreu i ‘‘Zgjidhjes’’ shpjegoi se pjesëmarrja e ulët në votime dëshmoi se qytetarët dëgjuan thirrjen lëvizjes së tij politike.
“Të zbresësh pjesëmarrjen në 9% është një shifër shumë e lartë. Ne nuk bëmë fushatë për të bërë zë në fletën e votimit, por për të bojkotuar zgjedhjet. Sa më i thellë bojkoti i këtyre zgjedhjeve, aq më shpejt do vijë reformimi i sistemit elektoral. Bojkoti shënoi rekord në këto zgjedhje”, shpjegoi Kokëdhima.
Marrëveshja Rama-Basha
Duke komentuar marrëveshjen e 18 majit Rama-Basha, Koço Kokëdhima tha se shumica që do qeverisë do bazohet në një bashkëpunim PS-PD, ndërsa marrëveshja nuk i shërbeu vendit dhe zgjedhjeve të lira.
“Shumica që do qeverisë do bazohet në një bashkëpunim mes PS dhe PD. Marrëveshja e 18 majit mendoj se nuk i shërbeu vendit dhe zgjedhjeve dhe nuk i përmirësoi standardet e zgjedhjeve dhe ishte e detyruar për opozitën”- përfundoi ish-aleati i Ramës, Koço Kokëdhima.
