Nënkryetari i Komisionit të Sigurisë, Flamur Noka ka folur për skandalin e 613 kilogramëve kokainë. Sipas Nokës, pronarët e vërtetë e kokainës nuk kapen sepse për ta kujdeset vetë qeveria.
Deputeti demokrat pyet se përse u dekonspirua operacioni dhe pse pronari i kompanisë u largua 1 ditë para sekuestrimit të kokainës, ndërsa i kërkon Ramës të tregojë se ku fshihet laboratori ku droga do të përzihej.
Deklarata e Nokës:
613 kg kokainë e pastër ka përfunduar deri më tani jetime dhe fatkeqësisht deri në fund të procesit duket se do rezultojë jetime. Kjo tregon qartë që ajo drogë ka ardhur në Shqipëri me garanci të fortë politike. Në duart e drejtësisë, si në rastin e Xibrakës, janë vetëm shoferi i kamionit dhe pritësi i ngarkesës me banane, sepse pronarët e vërtetë nuk zbulohen dhe nuk kapen sepse për ta kujdeset vetë qeveria sepse ajo nuk e kap dot familjen kryeministrore, vëllanë e Edi Ramës.
Policia shqiptare, ministri Xhafaj dhe Rama vazhdojnë të fshehin dhe nuk japin llogarin pse Çekaj u largua nga Shqipëria një ditë para se kokaina të kapej, pse u dekonspirua operacioni, si pasojë e të cilit droga është pa pronar. Pse e quajti Rama këtë operacion një sukses, kur është operacion i tradhtuar.
Rama duhet të thotë pse gënjen dhe kush e shtrëngoi atë të bënte gjithçka për të fshehur faktin që droga ishte e sinjalizuar nga DEA dhe marina kolumbiane. Rama hesht dhe nuk tregon a ka lidhje me kokainën kolumbiane vëllai i tij Olsi Rama. Kokaina ishte tërësisht e pastër, pra rreth 300 mijë euro një kilogram. Rama të tregojë se ku është laboratori ku droga do të përzihej dhe kush fshihet pas këtij laboratori.
Turp kombëtar më të madh nuk ka se të shndërrosh atdheun në parajsën e drogës dhe kokainës. TIRANA TODAY
