Zbulohen detaje të reja lidhur me operacionin ndërkombëtar, ku u kapën më shumë se gjysmë ton kokainë, plot 613 kg në një kamion në portin e Durrësit.
Sasia rekord e kapur në kontenier ishte vendosur në kuti bananesh, ndërsa kompania që kishte porositur bananet nga Kolumbia është “Arbri Garden”.
Sipas gazetares se “Neës24”, Klodiana Lala, referuar burimeve te saj ne Prokurorinë e Krimeve të Renda, janë tre personazhe të njohur të botës së krimit që janë duke u verifikuar.
Mësohet se bëhet fjalë për një rrjet të fuqishëm që trafikonte drogë në vendet e BE, ndërsa nga hetimet paraprake, mësohet se droga ka ndjekur këtë itinerar: Kolumbi, Itali, Maltë dhe Durrës.
Sapo ka mbërritur në Durrës, kontenieri, pas sinjalizimeve nga vendet partnere, është mbajtur nën vëzhgim përgjatë 24 orëve të fundit dhe është ndërhyrë teksa po bëhej transportimi për në magazinat e kompanisë “Arbri Garden” i bananeve.
Lala tha se ka dyshime të forta se kjo sasi rekord droge do kthehej prapë mbrapsht në vendet e BE, ndërsa shtoi se ka dyshime të forta se ky rrjet i fuqishëm i trafikimit të kokainës kanë lidhje me njerëz të politikës, e këto janë dyshimet e forta që kanë ngritur prokurorët të krimeve të Rënda te cilët janë mbledhur paraditen e sotme ne një analize rreth ngjarjes.
Nëse droga do të dilte në treg për shitje, vlera e saj kapte shifrat e 25 milionë euro. Sakaq, në polici janë shoqëruar disa persona, të cilët po merren në pyetje nga policia lidhur me ngarkesën në fjalë. Po ashtu policia po kryen kontrolle në disa banesa, ndërsa priten informacione nga policia dhe Krimet e Rënda.
