Shqipëria ka tashmë një Kod Doganor të standardeve europiane, të hartuar në bazë të direktivave të BE-së, i cili hyn nesër në fuqi.
Kodi i ri Doganor ishte miratuar që në korrik të vitit 2014.
Sekretariati i Këshillit të Investimeve në bashkëpunim me Drejtorinë e Përgjithshme të Doganave dhe Dhomën e Tregtisë dhe Industrisë, Tiranë organizuan një takim konsultativ me biznesin mbi risitë dhe avantazhet që ofron ky zhvillim i ri.
Kodi është hartuar në përputhje me direktivat e BE-së dhe ofron një sërë procedurash më të thjeshtuara për bizneset eksportuese dhe importuese me qëllim lehtësimin e tregtisë dhe nxitjen e mëtejshme të shkëmbimeve tregtare.
Së bashku me Kodin Doganor, Drejtoria e Përgjithshme e Doganave ka përgatitur disa dispozita zbatuese të kodit të ri.
Komuniteti i biznesit referoi disa shqetësime mbi procedurat doganore të ngritura edhe në Këshillin e Investimeve që lidhen kryesisht me zbatimin e të dhënave të disponueshme për përcaktimin e vlerës doganore, numrin e lartë të kontrolleve, paraqitjen fizike të një sërë dokumenteve në doganë, ndryshimet e klasifikimit tarifor të mallrave, trajtim i ankimimeve administrative në DPD, etj.
