Ajo mund të quhet padyshim “Kampionia e Tiranës”, pasi 2600 vajza e gra anëtare të Partisë Socialiste i besuan votën për drejtimin e Forumit të Gruas Socialiste.
Bëhet fjalë për Klodeta Dibrën, njëkohësisht pedagoge në Departamentin e Gjuhës italiane, Fakulteti i Gjuhëve të Huaja, Universiteti i Tiranës.
Ajo garoi përballë kandidateve Etilda Muhaj, Voltiza Prendi dhe Zana Sina, ndërsa arriti të marrë një fitore të thellë teksa mori plot 2600 vota, ndërsa kundërshtaret e saj arritën të merrnin vetëm nga 300-350 vota.
Pas kësaj fitoreje të bujshme, Dibra ka shprehur mirënjohje për të gjitha ato vajza e gra që i besuan postin e Kryetares së Forumit të Gruas.
“Sot shprehët vullnetin tuaj me votë demokratike duke dëshmuar se jeni pjesa më e dlirë dhe e jashtëzakonshme e shoqërisë shqiptare; Sot fitoi skuadra jonë, fryma e sinqertë dhe bashkëpunuese e grupit, guximi dhe vullneti për t’i shkuar garës deri në finish. Nga kjo garë nuk pati humbës dhe të humbur;
Jam e lumtur që ju takova, që kuvenduam, që ndamë ide e mendime, që u pamë sy më sy, që u rrokëm, që i shtrënguam dorën njëra-tjetrës; Sot është veçse fillimi i një rrugëtimi të gjatë”, shkruan Klodeta Dibra në një reagim në Facebook.
Në mbyllje të reagimit, Dibra ka shprehur falënderimet e saj përkundrejt kandidateve të garës, koordinatoreve të grave të 24 njësive, anëtareve të komisionit, administratoreve të njësive dhe strukturave të tjera, dhe së fundmi ka falënderuar për përkrahjen miqtë e familjen e saj.
Por, kush është Klodeta Dibra?
Prof. Dr. Klodeta Dibra është pedagoge në Departamentin e Gjuhës italiane, si dhe ka mbajtur pozicione të rëndësishme në arsimin e lartë. Të tilla si Dekane e Fakultetit të Gjuhëve të Huaja, Anëtare e Senatit akademik të Universitetit të Tiranës, Anëtare e Këshillit të Fakultetit të Gjuhëve të Huaja, Kryetare e Këshillit të Fakultetit të Gjuhëve të Huaja, etj.
Dibra është nderuar me medalje nderi të Kalorësit (Klasi III) “Ordine della stella della solidarietà italiana”, dhënë nga Presidenti i Republikës italiane Giorgio Napolitano më 17 tetor 2006.
Ajo numëron numër të madh pjesëmarrjesh në konferenca kombëtare dhe ndërkombëtare me botime artikujsh shkencorë nëpër revista shkencore; si autore e disa teksteve universitare, monografive dhe e fjalorëve. Gjithashtu, Dibra ka sjellë të shqipëruar disa autorë italianë si Carmine Abate, Dacia Maraini, Orianna Fallacci, Mario Luzi etj.
