Kitaristi legjendar amerikan Carlos Santana është rrëzuar në skenë gjatë një koncerti pranë Detroit, Michigan. Personeli mjekësor e trajtoi 74-vjeçarin në Clarkston, dhe më vonë u dërgua në departamentin e urgjencës të një spitali lokal për vëzhgim.
Santana, i cili ka lindur në Meksikë, më vonë shkroi në faqen e tij në Facebook se ai “harroi të hante dhe të pinte ujë” dhe “kështu që u dehidratua dhe ra”.
Menaxheri i tij Michael Vrionis tha se muzikanti po shkonte mirë. Megjithatë, menaxheri shtoi se një shfaqje e planifikuar për 6 korrik në Burgettstown, Pensilvani, “do të shtyhet për një datë të mëvonshme”.
Janë shfaqur pamjet që tregojnë Santana-n duke u ndihmuar në skenë në teatrin muzikor të Clarkson’s Pine Knob të martën. Kitaristi dhe grupi i tij Santana kanë qenë në turne në Amerikën e Veriut, me shfaqjen e tyre Miraculous Supernatural.
Ata u bënë të famshëm në vitet 1960 dhe ’70, duke qenë pionierë në një shkrirje të rock-and-roll dhe xhazit të Amerikës Latine. Ndër hitet më të mira të grupit janë Black Magic Woman, The Game of Love dhe Oye Como Va.
Shkurtin e kaluar, Santana dhe anëtarët e tjerë të grupit rezultuan pozitivë me Covid dhe iu desh të anulonin disa shfaqje.
Burimi i lajmit: BBC. Përshtatur nga Tirana Today
