Vrasja e 50-vjeçares Valdete Manaj nga Sheq i Madh në Fier, ka tronditur mbarë opinionin publik për mënyrën se si u tentua të mbulohej ngjarja nga autori. Vrasja makabre ka ndodhur mëngjesin e së martës, ku autor është bashkëshorti i saj 56-vjeçar, Petrit Manaj, i cili fillimisht pretendoi se gruaja kishte kryer vetëvrasje. Në ambientet e policisë, autori i dyshuar pranoi krimin, duke thënë se e kishte kryer për xhelozi.
Kushëriri i viktimës Valdete Mamaj, Sokrat Brahimaj, tha për mediat nga Levani se autori i vrasjes ishte me të meta mendore. Ai sqaroi se shpesh i kanë thënë të ndjerës të divorcohej, por ajo nuk pranonte për hatër të fëmijëve.
“Këtu jeton nëna e vajzës, ka dy vajza të tjera, djalin e ka në SHBA. Kjo ishte një ngjarje e dhimbshme, ka bërë një vrasje makabre dhëndri. Ai ka qenë me të meta mendore, këtu e ruante qetësinë, këtu kalonte. Nuk u divorcuan, kishin një djalë një vajzë. I kemi thënë vajzës të divorcohet, por nuk pranoi prej fëmijëve. Ka qenë problematik nga mendja. Herë pas here ushtronte dhunë, por nuk e prisnim të arrinte në këtë ekstrem. Nuk e ka denoncuar për hatër të fëmijëve”, tha ai.
Një mikeshë pranë familjes së viktimës u shpreh për mediat se çifti kishte probleme dhe grindeshin shpesh, pasi Petrit Manaj ishte xheloz. “E kam pasur shoqe. Familje shumë e mirë, nuk e meritonte. Kanë pasur probleme si çift, ishte xheloz ai dhe shpesh i sëmurë. Për banesën e fundit po e përcjellin nëna, motra, vëllai, fëmijët”, tha ajo.
Fillimisht ngjarja u raportua si vetëvrasje
Në trupin e gruas është konstatuar një plagë në shpinë dhe disa shenja në pjesë të tjera të trupit. Uniformat blu kanë marrë njoftim nga vëllai i Petritit, me profesion polic.
Pas grumbullimit të provave është thërritur për të dhënë dëshminë e tij para hetuesve edhe bashkëshorti i viktimës. Pas disa orë marrjesh në pyetje, ai ka pranuar se e ka vrarë ai të shoqen, duke shtuar më tej se dyshonte se e shoqja e tradhtonte, ndaj për këtë arsye ka kryer aktin e rëndë.
Pas krimit, bashkëshorti i viktimës kishte shkuar në lokalin e lagjes, dhe ka ngrënë bukë, që ta shikonin të tjerët. Kur është kthyer në banesë, ai ka thënë se e ka gjetur gruan të vrarë, duke njoftuar vëllain e tij, i cili ka lajmëruar edhe policinë. Por kur autori i krimit është pyetur nga policia për rrethanat, ai është bërë nervoz, duke ngjallur dyshime te policia.
