Ministria e Jashtme e Kinës njoftoi kundërmasa të reja kundër Uashingtonit të premten, duke përfshirë pezullimin e bisedimeve për klimën, në përgjigje të vizitës së Nancy Pelosi në Tajvan, disa orë pasi njoftoi sanksione kundër kryetarit të Dhomës së Përfaqësuesve të SHBA.
Masat përfshijnë anulimin e thirrjeve telefonike dhe takimeve të ardhshme midis liderëve të mbrojtjes kineze dhe amerikane, për të cilat datat e ardhshme nuk ishin shpallur, dhe anulimin e takimeve vjetore detare nën mekanizmin e konsultimit detar ushtarak Kinë-SHBA.
Kina gjithashtu pezulloi bashkëpunimin për riatdhesimin e emigrantëve të paligjshëm, ndihmën ligjore për çështjet penale dhe luftimin e krimeve ndërkombëtare, tha në një konferencë të premten zëdhënësja e Ministrisë së Jashtme Hua Chunying.
Ajo pezulloi bashkëpunimin e saj kundër drogës me SHBA-në, e cila tashmë është tensionuar vitet e fundit. Ministria e Jashtme e Kinës tha gjithashtu se do të pezullonte bisedimet për ndryshimet klimatike, një fushë kryesore e bashkëpunimit pavarësisht përshkallëzimit të tensioneve në vitet e fundit.
Lëvizjet vijnë pasi Pekini njoftoi se do të sanksiononte Pelosin dhe familjen e saj për vizitën në Tajvan, dhe ndërsa shtoi stërvitjet ushtarake dhe inkursionet e avionëve luftarakë rreth ishullit.
Më herët të premten, Ministria e Jashtme e Kinës dënoi Pelosin për ato që i përshkroi si “veprimet e saj vicioze dhe provokuese”, duke thënë se udhëtimi i saj në Tajvan përbënte “ndërhyrje serioze në punët e brendshme të Kinës”.
“Kryetarja e Dhomës së Përfaqësuesve të SHBA-së, Nancy Pelosi këmbënguli për të vizituar Tajvanin, duke mos marrë parasysh shqetësimet serioze të Kinës dhe kundërshtimin e vendosur, duke ndërhyrë seriozisht në punët e brendshme të Kinës, duke dëmtuar seriozisht sovranitetin dhe integritetin territorial të Kinës, duke shkelur seriozisht parimin e një Kine dhe duke kërcënuar seriozisht paqen dhe stabilitetin në ngushticën e Tajvanit”, thuhet në një deklaratë nga Ministria e Punëve të Jashtme të Kinës të premten.
“Në përgjigje të veprimeve të egra dhe provokative të Pelosit, Kina ka vendosur të vendosë sanksione ndaj Pelosit dhe familjes së saj të ngushtë”, thuhet në deklaratë.
Vizita e Pelosit në Tajvan të mërkurën, kur ajo u takua me Presidentin Tsai Ing-wen dhe udhëheqës të tjerë, ka zemëruar Partinë Komuniste të Kinës, e cila e sheh ishullin demokratik të vetëqeverisur si territorin e saj, pavarësisht se nuk e ka kontrolluar kurrë.
Marrë me shkurtime nga CNN. Përshtatur nga Tirana Today
