Shtetet e Bashkuara së bashku me Britaninë e Madhe dhe Francën nisën sot sulmin raketor të bazave të qeverisë së Bashar al Assad në Siri.
Ngjarja e ditës së sotme e ka ndarë opinionin publik botëror në dy pjesë të mëdha – në shumicën e vendeve që e mbështesin goditjen ndaj qeverisë që helmoi me gaz popullsinë e vet civile dhe në pak vende aleatë të Sirisë ose më saktë të thuhet, rivalët gjeopolitikë të Shteteve të Bashkuara.
Veç Rusisë dhe Iranit, Kina është vendi i tretë që e ka kundërshtuar sulmin e SHBA dhe Aleatëve.
Zëdhënësja e Ministrisë së Jashtme të Kinës deklaroi se “Kina është kundër përdorimit të forcës” pas sulmeve ajrore të udhëhequra nga SHBA kundër Sirisë dhe bëri thirrje për një “kthim në kuadrin e së drejtës ndërkombëtare”.
“Ne kundërshtojmë vazhdimisht përdorimin e forcës në marrëdhëniet ndërkombëtare dhe mbrojmë respektin për sovranitetin, pavarësinë dhe integritetin territorial të të gjitha vendeve.” – tha zëdhënësja e ministrisë së jashtme Hua Chunying.
Hua tha se veprimi i njëanshëm ushtarak duke anashkaluar Këshillin e Sigurimit të OKB-së thjesht sa do të ndërlikojë çështjen siriane.
“Kina beson se një zgjidhje politike është rruga e vetme reale për çështjen siriane dhe u kërkon të gjitha palëve përkatëse të kthehen në kuadrin e së drejtës ndërkombëtare dhe të zgjidhin çështjen përmes dialogut dhe konsultimit.” – tha zëdhënësja kineze.
