Pas lajmit të publikuar mbrëmë se historiani Olsi Jazexhi nuk la gjë pa thënë për shqiptarët dhe Skënderbeun, ka reaguar gazetari Mentor Kikia.
Kikia e sheh si shumë të rrezikshme hapësirën mediatike që i jepet Olsi Jazexhi nga mediat tona në të cilat ai del dhe hedh vetëm teza antikombëtare.
Në emisionin ‘Vo Centar’, Jazexhi ka thënë se Gjergj Kastriot Skënderbeu nuk ishte shqiptar, por greko-bullgar.
Madje ai ka deklaruar se shqiptarët janë një komb i shpikur nga turqit, ndërsa Kosova ka qenë e banuar nga serbët ortodoksë përpara se të mbërrinte Perandoria Osmane(lajmin e plotë lexoje këtu).
Për këto deklarata gazetari Kikia e shikon një pjesë të fajit dhe tek mediat shqiptare dhe emisionet e ndryshme.
“Por ky nuk është faji i tij. Ky është faji i mediave. Për hir të debatit apo të audiencës, mediat nuk mund të ftojnë e ti japin zë perversiteteve të tilla. Nëse këto deklarata do ti bënte një historian serb, grek apo maqedonas, neve do të na fyhej sedra e do të shpërthenim në akuza. Por me paturpësinë më të madhe, ne vetë i japim zë një njeriu që e mallkon Shqipërinë dhe përpiqet ta deformojë historinë në mënyrën më të pacipë të mundshme” deklaron Kikia.
Gazetari shkon akoma më tej kur thotë së duhet që të ndërhyjnë instutucionet. “Nëse medias tonë nuk i ka mbetur më cipë morali për çështjen kombëtare, atëherë duhet të ndërhyjnë institucionet. Të fyesh heronjtë kombëtar është vepër penale. Të fyesh simbolet e të shtrembërosh historinë, është vepër penale. AMA duhet të ndërhyjë e ti ndëshkojë këto media. Nuk kë të bëjë me cenimin e lirisë së fjalës kjo. Ka të bëjë me dinjitetin kombëtar. Shkoni e gjeni një rast të dytë, kur ekranet u hapen njerëzve që pshurrin mbi historinë e vendit të tyre.
Turp!” thotë ndër të tjera Kikia.
Postimi i plotë i Mentor Kikisë
Të ndalohen mediat të përdhosin historinë më gojën e këtij antishqiptari
Unë e respektoj dikë që mendon ndryshe nga unë, ndryshe nga shumë të tjerë, apo edhe nëse mendon ndryshe nga të gjithë të tjerët. Ata që mendojnë ndryshe nga të tjerët janë të prirur të bëhen protagonistë programesh televizive, sepse këto programe kërkojnë debat dhe debati prodhohet kur ka kundërshti.
Por ky njeriu që është në këtë fotografi(Olsi Jazexhi quhet), është bërë vizitor i rregullt i studiove, jo sepse mendon ndryshe nga shumë të tjerë, por sepse ai është ndër të rrallët që flasin shqip dhe ka nënshtetësi shqiptare, që vjell pa përtim vrer për vendin e tij, popullin e tij, historinë e popullit të tij, historinë e vendit të tij, heronjtë e popullit të tij. Nuk ia lejon formimi intelektual, por do të përdhoste edhe malet, fushat, lumenjtë dhe detet. Ky është historian. Eshte njeri i shkolluar e i lexuar.
Jam gjendur në një debat televiziv me këtë njeri dhe më ka pataksur lehtësia me të cilën ai pështynte mbi vendin e tij. Eshtë kaq flagrant, sa të duket budallallëk ta kundërshtosh. Por tashmë ky njeri po intervistohet edhe nga mediat e vendeve të tjera, duke shock-uar me ato që thotë edhe mendjet më antishqiptare.
Teza të tilla si: “Skëndërbeu ka qenë terrorist se ka vrarë myslimanë. Skëndërbeu nuk ishte as shqiptar, as luftëtar për lirinë e Shqipërisë, por një hero fals, i fabrikuar nga Austro-Hungarezët. Shqiptarët janë produkt i farës turke”, etj etj…, janë sot kudo në arkivat e televizioneve dhe mediave online.
Ai ka vendosur të mos lodhet se mallkuari gjithëcka lidhet me vendin e tij. Kjo është ajo që ai ka zgjedhur të bëjë. Por ky nuk është faji i tij. Ky është faji i mediave. Për hir të debatit apo të audiencës, mediat nuk mund të ftojnë e ti japin zë perversiteteve të tilla. Nëse këto deklarata do ti bënte një historian serb, grek apo maqedonas, neve do të na fyhej sedra e do të shpërthenim në akuza. Por me paturpësinë më të madhe, ne vetë i japim zë një njeriu që e mallkon Shqipërinë dhe përpiqet ta deformojë historinë në mënyrën më të pacipë të mundëshme.
Por çfarë po bën media, a po i shkel ajo ligjet e vendit? Padyshim që po. Nëse medias tonë nuk i ka mbetur më cipë morali për çështjen kombëtare, atëherë duhet të ndërhyjnë institucionet. Të fyesh heronjtë kombëtar është vepër penale. Të fyesh simbolet e të shtrembërosh historinë, është vepër pernale. AMA duhet të ndërhyjë e ti ndëshkojë këto media. Nuk kë të bëjë me cënimin e lirisë së fjalës kjo. Ka të bëjë me dinjitetin kombëtar. Shkoni e gjeni një rast të dytë, kur ekranet u hapen njerëzve që pshurrin mbi historinë e vendit të tyre.
Turp!
