Përfaqësuesja e Komisionit të zgjedhjeve në UT, Majlinda Keta është shprehur se rregullat në garën e drejtimit të universiteteve janë ashpërsuar. Sipas saj, të gjithë aspirantët e rinj që duan të kandidojnë duhet të plotësojnë kushtet e integritetit të figurës.
“E para është që të kalojë filtrin e dëshmisë së penalitetit. E dyta është pastërtia e figurës, me institucionet përkatëse që ka organizuar shteti shqiptar, dhe me të gjithë elementët që duhen shmangur, raportimet me historinë e sigurimit të shtetit, etj etj. E së treti, vetëdeklarimi që lidhet me çështjen e kontrollit të plagjiaturës në punimet e tyre akademike të marrjes së titujve.
Problemi që unë mendoj nuk është thjesht 10%, por sfida e tyre duhet të jetë pjesëmarrja e lartë në votime. E kjo do të sillte më tepër ndikim në daljen e autoriteteve”, tha ajo.
Ajo deklaroi se rregullorja për zgjedhjet e drejtuesve në institucionet publike të arsimit të lartë nuk po hartohet nga Ministria e Arsimit. Kjo gjë i është lënë në dorë vetë personelit të universitetit.
“Interesi publik, në kuadër të autonomisë universitare, u takon atyre që quan parlamente akademike të bëjnë vendimmarrje për mbarëvajtjen e punëve të tyre”, shprehet Keta.
Rregullorja do të miratohet ditën e hënë në Senatin Akademik.
