Spanja do të nisë pezullimin e autonomisë së Katalonjës të shtunën. Kjo bëhet e ditur nëpërmjet zyrës së kryeministrit spanjoll Mariano Rajoy, teksa udhëheqësi i Katalonjës ka kërcënuar se do të shpallë pavarësinë.
Sipas zyrës së kryeministri Rajoy, kabineti do të takohet për të aktivizuar nenin 155 të Kushtetutës, i cili i lejon të marrë përsipër udhëheqjen e rajonit:
“Qeveria e Spanjës do të vazhdojë me procedurat e përshkruara në nenin 155 të Kushtetutës, për të rivendosur ligjshmëri në vetëqeverisjen e Katalonjës”, thuhet në deklaratën e Zyrës së Rajoyt.
Lideri i Katalonjës, Carles Puigdemont, tha se Parlamenti i rajonit do të votojë për pavarësi nëse Spanja “vazhdon shtypjen”.
Neni 155 i Kushtetutës së Spanjës, parashikon hartimin e një listë masash nga qeveria, me të cilat nis transferimin e përgjegjësive nga Katalonja në Madrid.
Neni 155 thotë: “Nëse një komunitet vetëqeverisës nuk i përmbush detyrimet e imponuara nga Kushtetuta apo ligjet e tjera, ose vepron në atë mënyrë që dëmton seriozisht interesin e përgjithshëm të Spanjës, qeveria mund të marrë të gjitha masat e nevojshme për ta detyruar komunitetin që t’i përmbushë obligimet ose të mbrojë interesin e përgjithshëm të lartpërmendur”.
