Argjentina pëson një humbje të madhe vetëm pak ditë para se të fillojë Botërori, pasi ka pësuar një dëmtim të rëndë Manuel Lanzini. Futbollisti i West Hamit pësoi një dëmtim në ligamentet e gjurit të djathtë gjatë një seance stërvitore, lajm që u konfirmua nga Federata argjentinase e Futbollit nëpërmjet një postimi në rrjetin social “Twitter”.
Ky është dëmtimi i dytë në kampin e nënkampionëve të botës, pasi më parë e braktisi grumbullimin portieri Romero për shkak dëmtimi. Lanzini është vërtetë një nga futbollistët më pafat pasi edhe në vitin 2016-të nuk mundi të marrë pjesë në Lojërat Olimpike të Rio de Janeiros, sërish për arsye dëmtimi.
Sipas të përditshmes argjentinase “Clarin”, vendin e Lanzinit, i cili në këtë sezon shënoi 5 gola në 29 ndeshje, mund ta marrë Diego Perotti i Romës, ose Erik Lamela i Tottenhamit, me këtë të fundit që është një surprizë, duke qenë se ai ishte lënë edhe jashtë listës paraprake për këtë kompeticion.
