Deputeti Belind Këlliçi është prononcuar lidhur me arrestimet, për aferën e inceneratorëve. Në një deklaratë për mediat, Këlliçi tha se Alqi Bllako dhe Lefter Koka janë vetëm pikënisja, dhe se prangat duhet të tunden mbi përgjegjësit kryesorë.
“Ti hapet rrugë mbledhjes së Këshillit të Mandatave për Alqi Bllakon. Shqiptarët nuk duhet të harrojnë se Bllako dhe Lefter Koka janë pikënisja e kësaj afere. Prangat duhet të tunden mbi Agaçin, Ahmetaj, Veliaj dhe mbi të gjitha regjisor dhe urdhëruesin, Edi Ramën. Opinionit publik i është bërë e ditur. Dua të gjej rastin të përgëzoj edhe punën që është bërë në Komisionin Hetimor. Dua të përshëndes edhe bashkëpunimin me LSI. Sot shqiptarët kanë parë se janë lëshuar një seri urdhër arrestesh, por për shërbëtorët. Por ideatorët dhe përfituesit e vërtetë nisin me Edi Ramën, Veliaj, Ahmetaj dhe Agaçin.
PD: Rama mos bllokojë kërkesën e Prokurorisë
Partia Demokratike bën thirrje që kryeministri Edi Rama të mos bllokojë kërkesën e SPAK për heqjen e imunitetit të deputetit socialist Alqi Bllako, për të cilin kërkohet arrestimi pasi dyshohet si i përfshirë në aferën e inceneratorit të Fierit.
“Sot, SPAK njoftoi se ka kërkuar heqjen e imunitetit të deputetit socialist Alqi Bllako. Partia Demokratike i kërkon Edi Ramës të mos bllokojë kurrsesi kërkesën e Prokurorisë për hetimin e njërës prej aferave më të mëdha të korrupsionit në Shqipëri.
Partia Demokratike shton se Alqi Bllako, i zhytur kokë e këmbë në këtë aferë, është vetëm nënfishi i Ëngjëll Agaçit, Arben Ahmetajt, Erion Veliajt dhe padyshim i Edvin Ramës, përgjegjësia direkte e të cilëve në kuadrin e një grupi të strukturuar kriminal, është tashmë e qartë si drita e diellit”, thuhet në njoftimin e Partisë Demokratike.
