Një numër i madh qytetarësh grekë kanë udhëtuar ditën e djeshme dhe të sotme në drejtim të Jugut të Shqipërisë, për të përkujtuar ushtarët grekë të rënë gjatë luftës italo-greke. Mësohet se ata janë të afërm të ushtarëve të rënë dhe se do të marrin pjesë në ceremoninë e përvitshme përkujtimore.
Dita e sotme është një festë kombëtare në Greqi dhe njihet si Jo-ja greke (to megalo oxi). Bëhet me dije se, festa ka nisur me aktivitete në Këlcyrë dhe ka vijuar në Bularat të Gjirokastrës, ku janë vendosur kurora në varrezat e tjera të ushtarëve grekë.
Në ceremonitë kanë marrë pjesë zyrtarë të lartë të shtetit grek, si zëvendës ministri i jashtëm grek Andonis Dhiamataris dhe Ambasadorja Sofia Filipidu.
Kujtojmë që në tetor 2018, eshtrat e 573 ushtarëve të rënë, të zbuluar në fushën e Sajmolës në Dragot, u varrosën në Manastirin e Këlcyrës pa praninë e familjarëve, çka nxiti pakënaqësinë e tyre. Më herët, 100 eshtra të zbuluara nga këto gërmime u varrosën në Bularat.
Gjatë gërmive janë zbuluar 673 eshtra ushtarësh grekë të rënë gjatë luftës italo-greke edhe pse pretendimet e palës greke kanë qenë për një shifër disa herë më të lartë.
