Duke iu referuar burimeve diplomatike, gazeta Kathimerini ka shkruar se viti i ardhshëm mund të jetë kyç në zgjidhjen e kontestit të gjatë mes Greqisë dhe ish-Republikës Jugosllave të Maqedonisë në lidhje me emrin zyrtar të këtij shteti ballkanik. Emri i Maqedonisë dhe marrëdhënia me Greqinë prej shumë vitesh kanë përbërë problem.
Evropa dhe Uashingtoni besojnë se ka një dritare shprese për zgjidhjen e çështjes së emrit në periudhën mes zgjedhjeve lokale të tetorit në Maqedoni dhe zgjedhjeve presidenciale më 2019. Krijimi i qeverisë së kryeministrit socialdemokrat Zoran Zaev në qershor, pas trazirave të mëdha politike është një dritare shprese për zgjidhjen e kësaj situate. Pas krijimit të koalicionit qeverisës, ministri i jashtëm i Maqedonisë Nikolla Dimitrov muajin e kaluar udhëtoi në Athinë për t’u takuar me homologun e tij grek Nikos Kocias.
Fakti që interesi amerikan është përqendruar sërish në rajon, kryesisht për shkak të frikës se Rusia mund të shtrijë ndikimin e saj mbi shtetet e dobëta si Bosnjë-Hercegovina, është gjithashtu një element pozitiv.
Mësohet se zyrtarët amerikanë kanë vërejtur një kthim të pragmatizmit në Maqedoni, ku autoritetet po përgatiten të bëjnë kompromise dhe lëshime. Burimet perëndimore kanë kërkuar si nga Athina ashtu edhe nga Shkupi të shmangin dialogun publik për këtë çështje me qëllim të shmangies së rritjes së pritshmërive.
“Qëllimi është për hapat që do të ndërmerren nga të dyja palët gjatë vitit të ardhshëm dhe që bisedimet të përfundojnë para zgjedhjeve presidenciale në Maqedoni më 2019, kur Greqia do të ketë zgjedhje të përgjithshme”, shkruan Kathimerini.
